Ngjarje fetare

    Më 26.6.1617 u emërua i pari famullitar, dom Mateu Toçi. Në periudhën e mëparshme  funksionet fetare i kryente një zëvendës ekonom i emëruar nga Ipeshkvi i Rusanës. Tashmë në shekullin XVI, sipas Zangarit, në kishën e mëparshme e Strigarit ekzistonin dy tabernakuj e dy pagëzore, një për ritin grek e një për ritin latin, shenjë e qartë se të dyja ritet bashkekzistonin. Me bullën Romanus Pontifex e 26.2.1564  Piu V kishte nënshtruar besimtarët e ritit grek juridiksionit të ipeshkvijve latinë. Nga ai çast deri në 1919 bashkësia e Strigarit u var nga Arkipeshkvi i Rusanës. Me bullën Perbrevis Instructio e 31.8.1595 Klementi VIII krijoi peshkopin grek shugurues me seli në Romë, po për largësinë aq të madhe zgjidhja nuk ishte e përshtatshme.

    Kleri i ritit grek (priftërinjtë e edhe më shumë klerikët) sipas Vizitorëve apostolikë nuk kishte arsim të mjaftueshëm e prandaj nuk ishte në gjendje të zhvillonte në mënyrë të dobishme misionin e tij. Popullsinë e mbanin si të paditur dhe supersticioze. U arrit në pikën të ndaloheshin vallet e Pashkëve. Në vizitën baritore e 11.6.1631 ipeshkvi i Rusanës, Pier Antoni Spinelli, gjeti klerikë që nun dinin asgjë për Trininë dhe për misterin eukaristik e i urdhëroi famullitarit të shkurtonte qimet e buzës së sipërme ashtu që të mos vinin në kontakt me verën e shenjtëruar.

    Të dy famullitarët meshonin në të njëjtën kishë, dhe kjo shkaktonte pareshtur kundërshtime riti që ndanin jo vetëm popullsinë në përgjithësi, por edhe secilen familje, si nënvizon kryetari i bashkisë, Dhimitër Minshi, në letrën qe i dërgoi në vitin 1723 Kardinalit Anibal Albanit.

    Latinët festonin Shenjtërit Kozmain e Damjanin më 27 shtator (Shën Kozmai vikërr), ndërsa grekët më 1 nëntor(Shën Kozmai madh). Kjo datë e fundit më pastaj u shty në të dytën e diel të muajit ashtu që festa të mos përkonte me panairin e madh të Shkavunisë.

    Themelimi në 1732 në Shën Benedhit Ullan i të parit seminar për klerin kalabrez të ritit grek (që në 1794 u zhvendos në Kolegjin e Shën Adrianit në Shën Mitër Koronë) vëlëu për të garantuar në bashkësitë arbëreshe e ritit grek praninë e një kleri më të përgatitur e të motivuar. Me ngritjen e Eparhisë së Ungrit (1919) Strigari u nda përfundimisht nga dioqeza e Rusanës.

    I pari famullitar latin banues qe dom Felice Kùmni (1753); ai i fundit, dom Dant Skalmani (që u transferua në 1924). Më 26.10.1982 famullia latine u hoq.

    Riprodhojmë datat e fillimit të regjistrave të famullisë: të vdekur të rritit grek (1631) – të vdekur të rritit latin (1779) – pagëzime të rritit grek (1662) – pagëzime të rritit latin (1779) – martesa të rritit grek (1699) -martesa të rritit latin (1779) – krezma të rritit grek (1709) – krezma të rritit latin (1718).